ပျောက်ဆုံးပြီး အသတ်ခံလိုက်ရသည့် ကလေး၏ အမှုအား လူသတ်မှုအဖြစ် ဖွင့်လှစ်ထားပြီး ကလီစာများ ထုတ်ခံရသည်ဆိုသည့် ကောလာဟလများမှာ မမှန်ကန်

တာချီလိတ်မြို့တွင် မတ်လ(၂၇)ရက်နေ့ ညနေပိုင်းက ပျောက်သွားသည့် အသက်(၆)နှစ်အရွယ် မိန်းကလေး တစ်ဦး၏ ကိစ္စနှင့် ပတ်သက်၍ ပျောက်သွားသည့် ကလေးအား အသတ်ခံရသည့် အနေ အထားဖြင့် ပြန်လည်တွေ့ရှိရသည့် အတွက် တာချီလိတ်မြို့မ ရဲစခန်းတွင် လူပျောက်မှုအဖြစ် ဖွင့်လှစ်ထား ရှိရာမှ လူသတ်မှုအဖြစ် ပြောင်းလဲဖွင့်လှစ်ထားလိုက်ပြီး ကလေး၏ ခန္ဓာကိုယ်ထဲရှိ ကလီစာများမှာ အထုတ်ခံထားရပြီး သတ်ခံရတာဖြစ်ကြောင်း စသည့် ထွက်ပေါ်နေသည့် ကောလာဟလ များနှင့် ပတ်သက်၍ မမှန်ကန်ကြောင်း ခွဲစိပ်စစ်ဆေးမှုအရ သိရသည်။


ကလေးပျောက်ဆုံးမှု၏ ဖြစ်စဉ်မှာ တာချီလိတ်မြို့၊ မကာဟိုခမ်းရပ်ကွက်၊ အိမ်အမှတ်(၄/၁၈၇)နေ အသက် (၆)နှစ်ရှိ မနန်းဖွေးဟွမ်သည် နေအိမ်အပြန်လမ်းတွင် မတ်လ(၂၇)ရက် ည(၇း၃၀)နာရီ အချိန်ခန့်က ရုတ်တရက် ပျောက်သွားခဲ့ပြီး တာချီလိတ်မြို့မ ရဲစခန်းတွင် လူပျောက် အမှတ်စဉ် ၂/၂၀၁၅ဖြင့် အမှု ဖွင့်လှစ်ထားရှိသည်။

(၄)ရက်မြောက်နေ့ဖြစ်သည် မတ်လ(၃၀)ရက် ညနေပိုင်းတွင် ပျောက်ဆုံးနေသူ မနန်းဖွေးဟွမ်အား တာချီလိတ်မြို့အနီး ထိုင်းနိုင်ငံ မယ်ဆိုင်ဘက် မယ်ဆိုင်ရေချောင်းကမ်းစပ်တွင် ခန္ဓာကိုယ်အား ဆာလာအိတ်ဖြင့် ထည့်ထားပြီး လည်ပင်းတွင် နိုင်လွန်ကြိုးပတ်လျက် အနေအထားဖြင့် သေဆုံးနေတာကို တွေ့ရှိရသည့် အတွက် ထိုင်းနိုင်ငံ ရဲတပ်ဖွဲ့ နှင့် မြန်မာနိုင်ငံရဲတပ်ဖွဲ့မှ သွားရောက် စစ်ဆေးခဲ့ကြသည်။

ဆက်လက်၍ အလောင်းအား ထိုင်းနယ်နိမိတ်တွင် တွေ့ရှိရသည့်အတွက် ထိုင်းရဲများက ထိုင်းနိုင်ငံ၊ ချင်းရိုင်းဆေးရုံအထိ သယ်ဆောင်သွားပြီး စစ်ဆေးချက်များ ပြုလုပ်ကာ မတ်လ(၃၁)ရက် ညနေပိုင်းတွင် အလောင်းအား မြန်မာနိုင်ငံမှ တာန်ဝရှိသူများနှင့်အတူ ကျန်ရစ်သော မိသားစုဝင်များက ထိုင်းနိုင်ငံမှ တဆင့် တာချီလိတ်မြို့သို့ ပြန်လည် သယ်ဆောင်လာခဲ့ကြပြီး တာချီလိတ်မြို့တွင်လည်း လူသတ်မှုအဖြစ် ဆက်လက် အမှုဖွင့်လှစ်နိုင်ရန် အတွက် တာချီလိတ်ပြည်သူ့ ဆေးရုံရှိ ရင်ခွဲရုံတွင် ဆေးစာရယူရန် ပို့ဆောင်ထားရှိခဲ့ပြီး ယနေ့ ဧပြီလ(၁)ရက်နေ့ နံနက်ပိုင်းက ထပ်မံ၍ ရင်ခွဲစစ်ဆေးခဲ့ကြသည်။

သဆုံးသွားသော ကလေးငယ်၏ ရုပ်အလောင်းအား တွေ့ရှိရပြီးနောက် တာချီလိတ်မြို့ ဒေသတွင်း နှင့် လူမှုကွန်ယက်ဖြစ်သည့် ဖေ့ဘုတ် များပေါ်တွင် ကလေး၏ ကိုယ်ခန္ဓာအတွင်း ကလီစာများဖြစ်သည့်၊ အဆုတ်၊ အသည်း၊ ကျောက်ကပ် နှင့် မျက်လုံးများ ထုတ်ခံရပြီး အသတ်ခံရခြင်းဖြစ်ကြောင်း စသည့်ဖြင့် ထွက်ပေါ်နေသည့် ကောလာဟလများနှင့် ပတ်သက်၍ အများပြည်သူများနှင့် သက်ဆိုင်ရာမှ သိရှိနိုင်ရန် အတွက် ခွဲစိတ်စစ်ဆေးမှုများ ပြုလုပ်ရာတွင် တာချီလိတ်ပြည်သူ့ဆေးရုံမှ တာဝန်ကျ လက်ထောက်ဆရာဝန် နှင့် သက်ဆိုင်ရာ ကျန်းမာရေးအဖွဲ့၊ တာချီလိတ်မြို့မရဲစခန်းမှ ဒုရဲအုပ်ကိုကိုဦး၊ ကျန်ရစ်သူမိသားစုနှင့် သတင်းမီဒီယာများ ပါဝင်ခဲ့ကြသည်။

ခွဲစိတ်စစ်ဆေးမှုအရ သေဆုံးသူ ကလေးငယ်၏ လည်ပင်းတွင် ကြိုးကွင်းအရာ ထင်ကျန်နေပြီး ရေထဲတွင် အချိန်အတန်အကြာ နစ်မြှုပ်ပြီးသေဆုံးနေသည့်အတွက် မျက်လုံးနှစ်လုံးမှာလည်း ရေများစိမ့်ဝင်မှုကြောင့် ဖောင်းကားကာ အပြင်သို့ထွက်၍ ပျက်စီးနေပြီး ၀မ်းဗိုက်အတွင်း၌ ကလီစာများ အစုံအလင်ရှိနေသည်ကို တွေ့ရှိရသည်။

ထွက်ပေါ်နေသည့် ကောလာဟလများနှင့် ပတ်သက်၍ "အလောင်းကို ပထမဆုံး ချင်းရိုင်းမှာ ခွဲစိတ် စစ်ဆေးတော့ ကျွန်တော်ရှိနေတယ်၊ မြေးလေးရဲ့ ခန္ဓာကိုယ်မှာ ဒဏ်ရာဆိုလို့ ခေါင်းမှာ နည်းနည်း ရိုက်ခံထားရတဲ့ ဒဏ်ရာနဲ့ လည်ပင်းမှာ ကြိုးကွင်းကိုပဲ တွေ့တယ်၊ သူများတွေ ပြောပြောနေတဲ့ ခန္ဓာကိုယ် အတွင်းပိုင်းက ကလီစာတွေ ထုတ်ခံထားရတယ်ဆိုတာ မဟုတ်ပါဘူး၊ ခန္ဓာကိုယ်မှာ ဖောက်ခံထားရတာ၊ ပြန်ချုပ်ထားတာ တစ်ခုမှ မရှိဘူး၊ ဆေးရုံက ပြန်ချုပ်ပေးထားတာပဲရှိတယ်.."ဟု သေဆုံးသူ၏ အဖိုးဖြစ်သူ ဦးစိုင်းတစ်က တာချီလိတ်အွန်လိုင်းသို့ ပြောပြသည်။

"ဘာကြောင့်များ ကောလဟလတွေ လွှင့်လည်း မသိဘူးဗျာ၊ အတိအကျ သိချင်ရင် ကြော်ငြာထားတဲ့ ဖုန်းနံပါတ်ကို ဆက်မေးလို့ ရပါတယ်၊ အခုတော့ ကလေးရဲ့ အဖြစ်ဆိုးပြီး သေဆုံးနေတဲ့ ပုံတွေ နဲ့ ကလီစာတွေ ထုတ်ခံထားရတာတွေဆိုပြီး ရေးထားတာကို ဖေ့ဘုတ်ပ်ါတွေမှာ တွေ့ရတော့ တကယ် စိတ်မကောင်းဖြစ်မိတယ်"ဟု သေဆုံးသူ၏ မိသားစုဝင် တစ်ဦးကလည်း တာချီလိတ်အွန်လိုင်းသို့ ပြောသည်။

ကလေးငယ် အသတ်ခံရမှုနှင့် ပတ်သက်၍ ဒေသခံများ မိမိကလေးများ အပေါ် စိုးရိမ်ထိတ်လန့်မှုများ ဖြစ်ပေါ်နေလျက်ရှိပြီး တရားခံအား အမြန်ဆုံး ဖမ်းဆီးရမိရန် လိုလားလျက်ရှိကြောင်း သိရသည်။

“ကလေးကို ရက်ရက်စက်စက် သတ်သွားတဲ့သူ အမြန်ပေါ်စေချင်တယ် အခုဆို အိမ်က ကလေးတွေတောင် အပြင် မထွက်ခိုင်းရဲဘူး”ဟု ဒေသခံ ကလေးမိခင်တစ်ဦးမှ ပြောသည်။

"တာချီလိတ်ဆေးရုံမှာ အလောင်းကို ရင်ခွဲပြီး စစ်ဆေးတဲ့အခါမှာ ကိုယ်အင်္ဂါစုံလင်စွာရှိနေတာကို တွေ့ရပါတယ်၊ ဖေ့ဘုတ်ပေါ်မှာ ပြန့်နှံ့နေတဲ့ ကလီစာ ဖောက်ထုတ်ခံရပြီး အသတ်ခံရတယ်ဆိုတဲ့ ကောလာဟလဟာ မှားယွင်းနေပါတယ်၊ ကျွန်တော်တို့အနေနဲ့ အမှုမှန်ကို စုံစမ်းဖော်ထုတ်နေတဲ့ အခါမှာ အထောက်အကူဖြစ်စေရန် အတွက် ကောလာဟလတွေ မထုတ်လွှင့်ဖို့ ရှောင်ရှားပေးစေလိုပါတယ်.."ဟု တာချီလိတ်မြို့မ ရဲစခန်းမှူး ဒုရဲမှူး ကျော်သန်းမှ ပြောသည်။

အမှုနှင့် ပတ်သက်၍ ကြားသိရသည့် သတင်းများကို ရဲတပ်ဖွဲ့ဝင်များထံ သတင်းမှန်များ ပေးရန် မေတ္တာရပ်ခံကြောင်း၊ ၎င်းတို့ထံ ဖုန်းများမှ တဆင့်လည်း ဆက်သွယ်ပြီး သတင်းမှန်များပေးပို့နိုင်ကြောင်း နှင့်  မြန်မာဖုန်း ၀၉၅၃၆၆၂၀၈ နှင့် ထိုင်းဖုန်း ၀၈၅၀၃၃၆၉၃၉ အပြင် စခန်းရုံးဖုန်း ၀၈၄၅၁၀၀၂ တို့မှ တဆင့် အချိန်မရွေး ဆက်သွယ်နိုင်ကြောင်း ၎င်းမှ ပြောသည်။

အမှုမှန် ပေါ်ပေါက်ရေးအတွက် တာချီလိတ်မြို့မရဲစခန်းမှူး ဒုရဲမှူးကျော်သန်းနှင့်အဖွဲ့မှ စစ်ဆေးနေလျက် ရှိပြီး မတ်လ(၂၇)ရက်နေ့က ဖွင့်လှစ်ထားရှိခဲ့သည့် လူပျောက် အမှတ်စဉ် (၂/၂၀၁၅)မှ မတ်လ (၃၁)ရက်နေ့တွင် လူသတ်မှုအဖြစ် တာချီလိတ်မြို့မ ရဲစခန်း၌ (ပ)၇၁/၂၀၁၅၊ ပြစ်မှုပုဒ်မ ၃၀၂ ဖြင့် ပြောင်းလဲ၍ အမှုဖွင့်ထားရှိကာ တရားခံအား အမြန်ဆုံး ဖမ်းဆီးရမိနိုင်ရေးအတွက် စုံစမ်းဖော်ထုတ် နေလျက်ရှိကြောင်း တာချီလိတ်မြို့မရဲစခန်းမှ သိရသည်။
FROM:::::::::: တာချီလိတ်
http://www.tachileik.net/2015/04/b.html